Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ՈՒԽՏԱԳՆԱՑՈՒԹՅՈՒՆ ԳԵՂԱՐՔՈՒՆՅԱՑ ԹԵՄ

գոստոսի 27-ին, Շիրակի թեմի Առաջնորդ Տ. Միքայել արքեպս. Աջապահյանի օրհնությամբ եւ առաջնորդությամբ, թեմի երիտասարդաց միությունը կազմակերպել էր ուխտագնացություն դեպի Գեղարքունյաց թեմ՝ համախմբելով ավելի քան 110 երիտասարդների:

Օրվա առաջին հանգրվանը Հայրավանքն էր: Այստեղ երիտասարդները մասնակցեցին միասնական ժամերգության՝ գլխավորությամբ Տ. Մակար քհն. Գալամդարյանի, Արտաշես եւ Վահան սարկավագների: Սեւանա լճի ափին գտնվող Հայրավանքը դարերի պատմություն ունեցող հոգեւոր կենտրոն է, եւ սրբավայրի խաղաղ միջավայրը յուրահատուկ խորհուրդ հաղորդեց ներկաների աղոթքին:

Հայրավանքից հետո ուխտավորները շարունակեցին ճանապարհը դեպի Վանեվանք, ուր եւս մեկ անգամ համախմբվեցին միասնական աղոթքի:

Ուխտագնացության կարեւորագույն բաղադրիչներից էր նաեւ երիտասարդների անմիջական շփումը թեմակալ Առաջնորդի հետ: Երիտասարդները հնարավորություն ունեցան Սրբազան Հորն ուղղել իրենց հուզող հարցերը, բարձրաձայնել մտքերն ու մտահոգությունները եւ ստանալ հայրական խորհուրդներ:

Վանեվանքի բակում կազմակերպվեց նաեւ սիրո ճաշ, որը դարձավ օրվա ջերմ ու խորհրդանշական դրվագներից մեկը: Քրիստոնեական համայնքի կյանքում միասին ճաշելը ոչ միայն ընկերական շփման, այլեւ միմյանց հանդեպ սիրո, հոգատարության ու միասնության արտահայտություն է:

Օրվա հոգեւոր ընթացքին զուգահեռ՝ կարեւոր տեղ էր հատկացված նաեւ ազգային արժեքներին: Ուխտագնացության անբաժան մասն էին կազմում ազգային երգն ու պարը:

Երիտասարդական ուրախությունն ու ընկերական շփումը շարունակվեցին նաեւ Սեւանա լճի ափին, ուր մասնակիցները հնարավորություն ունեցան հանգստանալ, զրուցել եւ միասին անցկացնել օրվա վերջին հատվածը: Հոգեւոր ապրումներին, աղոթքին ու զրույցներին ավելացավ նաեւ հետաքրքիր ժամանցը՝ ստեղծելով ամբողջական եւ հիշարժան օր:

Սրբազան Հոր կողմից երիտասարդներն ունեին նաեւ հյուրասիրություն, որը ճաշակեցին Սեւանա լճի հարակից տարածքում:

Երիտասարդաց միության համար նման նախաձեռնությունները նաեւ երիտասարդների հետ շարունակական աշխատանքի կարեւոր ուղղություններից են: Դրանք նպաստում են Եկեղեցու եւ երիտասարդների միջեւ կապի ամրապնդմանը, վերջիններիս հոգեւոր կյանքի զորացմանը, ազգային ու քրիստոնեական արժեքների առավել խոր ընկալմանը եւ միմյանց հանդեպ պատասխանատվության ու հոգատարության ձեւավորմանը:

ՄԱՐԻԱՄ ՍՈՒՔԻԿՅԱՆ
ԼՈՒՍԱՆԿԱՐՆԵՐԸ՝ ԹԱԳՈՒՀԻ ՍՈՒՔԻԿՅԱՆԻ

>>>