Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ԽԱՉՎԵՐԱՑԻ ՏՈՆԸ ՄԱՅՐ ԱԹՈՌ ՍՈՒՐԲ
ԷՋՄԻԱԾՆՈՒՄ

«Որ զանարատ բազուկս Քո ի խաչին տարածեցեր, Քրիստոս Աստուած,
եւ նշան յաղթութեան տւեր մեզ, սովաւ զկեանս մեր պահպանեա...»:
ՇԱՐԱԿՆՈՑ

երունահաստատ Սուրբ Էջմիածինը՝ լուսավորչակերտ Մայր Տաճարով, հավաստիքն է Աստծո հետ մեր հավիտենական ուխտի, դարավոր վկան առ Աստված ու հայրենին նվիրումով ապրելու մեր համընդհանուր վճռականության, պայծառ փարոսը ազգային, եկեղեցական մեր անդաստանի: Արդար ու ճշմարիտ է՝ Սուրբ Էջմիածինը, հոգեփրկչական ու ազգապահպան իր ծառայությամբ, դարձել է հիմնասյունը եւ անառիկ միջնաբերդը հայոց ինքնության ու լինելիության խորհրդանիշն ազգի միասնականության եւ, Արարատ սուրբ լեռան պես, մեր հարատեւության: Սուրբ Էջմիածինն Աստծո մշտնջենական ներկայությունն է հայերիս կյանքում՝ աներեր ու անհաղթելի:

Պատմության հոլովույթներում Հայոց Եկեղեցին, Սուրբ Էջմիածին հոգեւոր կենտրոնով, բազմիցս ենթարկվել է հարձակումների ու հալածանքների, սակայն, հավատի անպարտելիությամբ, հաղթահարել է դժվարություններն ու մարտահրավերները: Սուրբ Էջմիածինը, ինչպես բնորոշել են մեր հայրապետները, առաքելություն է, որ առաջնորդում է մահվանից դեպի կյանք եւ ամեն հայի հոգում պատկերագրում Աստծո Էջքը: Այն ուղղակի քարեղեն կառույց չէ, այլ, առաջին հերթին, հոգեւորականների ու հավատցյալ ժողովրդի մի ամբողջություն՝ որպես միմյանց լրացնող մասնիկներ:

Սուրբ Էջմիածինն աշխարհասփյուռ հայության հոգեւոր մկրտության ավազանն է: Միածնաէջ նվիրական այս սրբավայրում՝ Ս. Լուսավորչի Աջի հովանու ներքո, զրուցակից ենք Աստծո եւ ինքներս մեզ հետ: Այսօր Հայաստանյայց Եկեղեցին իր աղերսն է առաքում դեպ երկինք, որպեսզի Բարձրյալ Տերն Իր իսկ հաստատած Մայր Աթոռը՝ հայոց հավատի անխորտակելի Վեմը, անպարտելի, միշտ անհողդողդ ու անարատ պահի-պահպանի՝ ի փառս Իր Սուրբ անվան: Թող Սուրբ Էջմիածնի լույսը մշտապես ուղեկից լինի հայ ազգին՝ հոգում զորացնելով երկնառաք Հույսը, Հավատն ու Սերը:

ՍՈՒՐԲ ՊԱՏԱՐԱԳ ՄԻԱԾՆԱԷՋ ՄԱՅՐ ՏԱՃԱՐՈՒՄ

Սեպտեմբերի 13-ին Հայաստանյայց Առաքելական Սուրբ Եկեղեցին հանդիսավորությամբ նշեց հինգ տաղավար տոներից վերջինը՝ Խաչվերացը: Նվիրական օրվա առիթով՝ Միածնաէջ Մայր Տաճարում, հանդիսապետությամբ Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսի, մատուցվեց ուխտի Սուրբ եւ անմահ Պատարագ: Օրվա պատարագիչն էր Շիրակի թեմի բարեխնամ Առաջնորդ Գերաշնորհ Տ. Միքայել արքեպիսկոպոս Աջապահյանը:

Սրբազան արարողակարգի ընթացքում՝ «Հայր մեր»-ից առաջ, Սրբազան Հայրն իր քարոզում անդրադառնալով օրվա խորհրդին, նշեց, որ Խաչվերացը տխրության, սգի, տրտմության ու չարչարանքի գիտակցության օր չէ, այլ խաչի հաղթության ու բարձրացման օր:

Խոսելով Խաչվերացի տոնի պատմական իրադարձությունների մասին՝ Միքայել արքեպիսկոպոսն ընդգծեց, որ, ինչպես մեր եկեղեցական ցանկացած տոն, Խաչվերացը եւս ասելիք ունի այսօրվա հավատավոր մարդուն: Այն մեզ համար սոսկ պատմական իրադարձություն չէ, այլ այսօր տեղի ունեցող կենդանի իրողություն, որ միտված է փոխակերպել մեզ, որպեսզի մենք նմանվենք մեր Երկնավոր Հորը:

«Խաչվերացը պատգամ ունի՝ փարվել խաչին ու Խաչյալի խորհրդին եւ դրանով վաստակել հարություն ոչ միայն անհատական, այլեւ հավաքական ու հայրենական կյանքում: Խաչը պետք է հաղթական լինի մեր երկրի բոլոր անկյուններում, եւ երբեք թույլ չպիտի տանք, որ խաչի նշանն անարգվի»,- հավելեց պատարագիչ Սրբազան Հայրը:

Քարոզի վերջում, վերստին դիմելով ներկաներին, Սրբազան Հայրը պատգամեց Քրիստոսի Կենարար Խաչն ունենալ սրտերում, մտքերում եւ հոգիներում՝ իբրեւ կենարար մի աղբյուր, որ կյանք է տվել դարեր շարունակ, կյանք է տալիս այսօր եւ տալու է վաղը, որովհետեւ Խաչյալին մահ չկա, եւ խաչին փարվածին սպասվում է հարություն ու հաղթանակ:

Սրբազան արարողակարգին ներկա էին Մայր Աթոռի միաբաններ, մեծաթիվ հավատացյալներ, ովքեր ուխտավորաբար Մայր Աթոռ էին ժամանալ Հայաստան աշխարհի տարբեր վայրերից: Ուխտավորների թվում էին նաեւ Շիրակի մարզից եկած մեծաթիվ բարեպաշտ քրիստոնյաներ՝ ներկա գտնվելու, սիրելի Առաջնորդ Սրբազանի ձեռամբ մատուցվող, Սուրբ Պատարագին, ունկնդրելու նրա ոգեշունչ քարոզ-պատգամը եւ առ Բարձրյալը հղելու իրենց աղոթք-խնդրանքը:

Հավելենք նաեւ, որ Գյումրու Սուրբ Յոթվերքի մի խումբ ուխտավորներ իրենց խորին շնորհակալությունն են հայտնում մայր եկեղեցու խաչքավոր Սեդրակ Հարությունյանին՝ իրենց աջակցելու համար:

Նույն օրն Առաջնորդ Սրբազանը Գյումրու Սոիրբ . Աստվածածին մայր եկեղեցում, հավարտ կիրակնօրյա ժամերգության, հանդիսապետեց Խաչվերացի թափորը:

ՄԱՅՐ ԱԹՈՌ ՍՈՒՐԲ ԷՋՄԻԱԾԻՆ
ՏԵՂԵԿԱՏՎԱԿԱՆ ՀԱՄԱԿԱՐԳ
ԱԼՎԱՐԴ ԿԱՂԶՎԱՆՑՅԱՆ

>>>