ԴՊՐԱԿԱՆ
ԱՍՏԻՃԱՆԻ ՏՎՉՈՒԹՅՈՒՆ ՍՈՒՐԲ ՅՈԹՎԵՐՔՈՒՄ
ռաքելական
հաջորդականության սրբազան արարողությամբ կրկին վերակենդանացել էր
Գյումրու Ս. Յոթվերք մայր եկեղեցին, որ ցայսօր պահել է դարերի հիշողությունն
իր սրբասուրբ կամարների ներքո:
Երկար ընդմիջումից հետո՝ դեկտեմբերի 24-ին, ձեռամբ Շիրակի թեմի Առաջնորդ
Տ. Միքայել արքեպս. Աջապահյանի, տեղի ունեցավ դպրական աստիճանի տվչություն:
Հայ Առաքելական Սուրբ Եկեղեցու փոքր աստիճաններից առաջին չորսը կոչվում
են դպրություն: Դպիրները շապիկ են հագնում, կիսասարկավագի պաշտոն
կատարում, երգում շարականներ եւ մասնավորապես Սուրբ Պատարագի երգերը:
Հավարտ
երեկոյան ժամերգության՝ սուրբգրային ընթերցվածների եւ շարականների
լուսերգության ուղեկցությամբ, դպրության աստիճան ստացան Մհեր Առաքելյանը,
Համլետ Այվազյանը, Մանուկ Հովհաննիսյանը, Սամվել Չաղայանը եւ Իշխան
Բարոյանը: Եկեղեցու դռան մոտ՝ Սրբազան Հոր առջեւ, ծնկի եկան ընծայացուները:
Թեմակալ Առաջնորդը, ըստ կարգի, նախ նրանց մազերը կտրեց խաչաձեւ՝
այսպես բանաձեւելով. «Ի հատանել հերացդ՝ հատցի ի քէն երկրաւոր ցանկութիւն
աշխարհիս»: Հետո նրանց տվեց սաղմոսարանը, որ Ատյանի ժամագիրքն է՝
ասելով. «Ունկն դիր եւ տես, զոր եղանակես բերանով…», ապա հանձնեց
ավելը. «Առ քեզ հրաման լինել աւելածու ի տան Տեառն եւ ի գաւիթս Աստուծոյ»:
Դռնապանի
աստիճանը տրվեց նույն տեղում, այնուհետեւ ծիսակատար Սրբազանը եկեղեցու
բանալին դրեց ընծայացուների ձեռքը՝ հավելելով. «Առ քեզ իշխանութիւն
բանալոյ եւ փակելոյ զդուռն սրբոյ տաճարիս…»: Որից հետո կատարվեց
ընթերցողի կարգը. «Առ քեզ իշխանութիւն ընթեռնուլ զգիրս զայս եւ լեր
աստուածային բանին պատմող եւ տեղեկացիր նոցին…»: Սրան հաջորդեց ջահընկալի
կարգը: Եպիսկոպոսական աթոռը դրվեց դասի առջեւ եւ կատարվեց կարգը:
Սրբազան Հայրը նստելով աթոռին՝ լուսավառ աշտանակը հանձնեց ընծայացուների
ձեռքը՝ ասելով. «Ընկալ զաշտանակ լապտերիս եւ ունիս իշխանութիւն լուցանել
զջահս եւ զկանթեղս ի սուրբ Եկեղեցիս», ապա տվեց նաեւ դատարկ բաժակամանը.
«Առ զբաժակամանս զայս՝ լնուլ ի սա զգինի ի սպաս խորհրդոյն»:
Արարողության վերջում նորոգ դպիրներին իր հայրական օրհնությունը
շնորհեց Միքայել Սրբազանը: Բարեմաղթանքների խոսքում Սրբազան Հայրն
առանձնակի շեշտեց հոգեւորականի պարտականության դժվարությունները,
դրանց հաղթահարման ճանապարհին գործադրվելիք ջանքերը, նաեւ մաղթեց,
որ դպիրներն առավել բարձր աստիճանների հասնեն իրենց աստվածատուր
գործի խորդուբորդ ընթացքին:
Արարողությանը ներկա էին թեմի արժանապատիվ Տեր Հայրերը, ծնողներ,
հավատացյալներ:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐՆԵՐԸ՝ ԳԵՎՈՐԳ ՂԱԶԱՐՅԱՆԻ
>>>
|
|