ՆՈՐՈԳԵՆՔ
ՄԵՐ ՈԽՏՆ ԱՍՏԾՈ ՀԵՏ
«Ստեփանոս քաղցրիկ տատրակ, Սուրբ զուարթուն
անուն «Պսակ»,
գեղեցկացար անօրինակ, բայց ներկեցար արեան գունակ»:
ՏԱՂ ՍՐԲՈՅՆ ՍՏԵՓԱՆՈՍԻ
եկտեմբերի
25-ին մի խումբ ուխտավորներ, ստանալով Շիրակի թեմի բարեխնամ Առաջնորդ
Տ. Միքայել արքեպս. Աջապահյանի հայրական օրհնությունը, նախաձեռնությամբ
Զարիկ Իգիթյանի եւ Ժաննա Խաչատրյանի, մեկնեցին ուխտագնացության Արմավիրի
թեմի Դողս գյուղ, ուր գտնվում է Ս. Ստեփանոս Նախասարկավագի անվան
եկեղեցին: Տերն ասում է. «Եթե մեկը սիրում է ինձ, իմ խոսքը կպահի
եւ իմ Հայրը նրան կսիրի, եւ Մենք նրա մոտ կգանք եւ նրա մոտ կօթեւանենք»
(Հովհ. ԺԴ 23): Արդարեւ, Ստեփանոսը սիրեց Տիրոջը եւ, առանց որեւէ
գայթակղության ենթարկվելու, պահեց Նրա խոսքերը: Սուրբ Ստեփանոսի
նահատակությունն արժեւորվեց որպես, նրանից հետո նահատակված, սրբերի
զոհաբերության խոր-հրդանիշ: Վերջինս, ժողովականներից քարկոծվելիս,
աղոթում է Տիրոջը՝ խնդրելով. «…Սա մեղք մի համարիր նրանց» (Գործք
Է 59): Սուրբն ավանդելով հոգին՝ դարձավ Քրիստոսի համար նահատակված
առաջին վկան ու մարտիրոսը, ուստի կոչվեց Նախավկա: Թեեւ նա կենցաղավարեց
պատմության ու ժամանակի մեջ, սակայն իր առաքինի գործերով ու սրբակենցաղությամբ
անմահացավ՝ դառնալով հավիտենականության ժառանգորդ եւ օրինակ յուրաքանչյուր
քրիստոնյայի համար: Կյանքում նա անտեսեց ժամանակավորն ու անցավորը
եւ ձգտեց մշտամնա արժեքների՝ գանձեր դիզելով երկնքում:
ՍՈՒՐԲ ՍՏԵՓԱՆՈՍ ԵԿԵՂԵՑԻ
Ուխտավորների առաջին հանգրվանը Դողս գյուղի Ս. Ստեփանոս եկեղեցին
էր: Գմբեթավոր եկեղեցու սեւ ու կարմիր տուֆի սրբատաշ քարերին նոր
երանգներ էին խառնել սպիտակահեր ծառերն ու թփերը: Ներսում ասես շարունակվում
էր գույների շքերթը՝ եկեղեցին զարդարող որմնանկարների տեսքով: Այստեղ
ուխտավորները ներկա գտնվեցին, տոնի ուրախ առիթով մատուցվող, Սուրբ
եւ անմահ Պատարագին: Օրվա պատարագիչն էր Տ. Ստեփանոս ավգ. քհն. Մելիքյանը:
Սրբազան արարողակարգի ընթացքում՝ «Հայր մեր»-ից առաջ, օրվա խորհուրդը
մանրամասնող ոգեշունչ քարոզ խոսեց Արմավիրի թեմի Առաջնորդ Տ. Սիոն
արքեպս. Ադամյանը: Ի լրումն օրվա խորհրդի՝ ներկաներն ստացան Սուրբ
Հաղորդություն:
ՍՈՒՐԲ ԱՆՆԱ ԵԿԵՂԵՑԻ
Հաջորդ կանգառը Աղավնատուն գյուղի Ս. Աննա եկեղեցին էր: Այստեղ եւս
ուխտավորները ծնրադիր աղոթք առաքեցին առ Բարձրյալը՝ խնդրելով աշխարհին
խաղաղություն, իրենց օջախներին հաջողություն, Հայ Առաքելական Սուրբ
Եկեղեցուն անսասանություն:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐԸ՝ ԱՐՄԻՆԵ ԱՍԱՏՐՅԱՆԻ
>>>
|
|