ՇՆՈՐՀԱՎՈՐ
ԲԱՐԵԿԵՆԴԱՆ, ԲԱՐՈՎ ՀԱՍՆԵՆՔ
ՍՈՒՐԲ ՀԱՐՈՒԹՅԱՆ
ետրվարի
11-ին Հայ Առաքելական Սուրբ Եկեղեցին նշեց Բուն բարեկենդանը, որը
համարվում է Մեծ պահքի առաջին կիրակին: Բարեկենդան նշանակում է բարի
կենդանություն: Այն ուրախության ու զվարճանքի օր է, հիշեցնում է
Ադամի ու Եվայի դրախտային կյանքը, երբ նրանք ապրում էին վայելքի
ու անհոգության մեջ:
Շիրակի թեմի բարեխնամ Առաջնորդ Գերաշնորհ Տ. Միքայել արքեպս. Աջապահյանի
օրհնությամբ թեմի Երիտասարդաց միությունը, «Երիտասարդական պալատ»
ՀՈԱԿ-ի եւ «Հրայրք» ավանդական պարի խմբի հետ, Սուրբ եւ անմահ Պատարագից
հետո, Գյումրու Վարդանանց հրապարակում օրն իրական տոնախմբության
վերածեցին:
Ազգային խաղերը, թեմատիկ բեմադրությունները, ազգային երգն ու պարը,
դիմակների շքերթը յուրահատուկ տրամադրություն էին ստեղծել քաղաքի
սրտում:
Արժանապատիվ Տ. Մակար քհն. Գալամդարյանի օրհնությամբ ու ողջույնի
խոսքով ազդարարվեց, Բուն բարեկենդանին նվիրված, տոնակատարության
մեկնարկը: Տեր Հայրն իր խոսքում շեշտեց, որ ինչպես անձնակերտման
համար կարեւոր են հոգին ու մարմինը, քանզի առանց հոգու մարմինը մահացած
է, իսկ մարմինը կարեւոր է հոգու դրսեւորումների համար, այնպես էլ
մեր ազգային-քրիստոնեական ինքնության համար կարեւոր են տոներին եկեղեցում
Սուրբ Պատարագի խորհրդին ներկա գտնվելը եւ դրանից բխող մեր կենցաղային
տոնախմբությունը:
Տոնական
օրվա ամենասպասված հյուրերն էին Ուտիս տատն ու Ակլատիզը, ովքեր ամբողջացրին
տոնական միջոցառումը: Ուտիս տատը խորհրդանշում է տարվա ուտիք օրերը,
իսկ Ակլատիզը կամ Պաս պապը՝ պահոց օրերը: Հարատեւ է Ուտիս տատի եւ
Պաս պապի պայաքարը: Պաս պապը կարծում է, որ Ուտիս տատն ուտելիքներով
կերակրում է մարմինը, իսկ ինքը, զրկելով ճոխ ուտելիքներից, օգնում
է մարդկանց՝ աղոթքի, Աստվածաշնչի ընթերցումով, ինքնաքննության միջոցով
զորացանել հոգին:
Միջոցառման վերջին հատվածում երիտասարդները ներկաների հետ պատրաստեցին
Ակլատիզի տիկնիկը, որն ունի յոթը փետուր: Դրանք խորհրդանշում են
պահոց յոթը կիրակիները: Ամեն փետուրը դնելիս բոլորը միասնաբար վերհիշեցին
պահոց կիրակիների անունները:
Միջոցառմանը ներկա էին նաեւ Գյումրի համայնքի ղեկավարի առաջին տեղակալ
Լուսինե Սանոյանը, մշակույթի եւ երիտասարդության հարցերի բաժնի ղեկավար
Լիլիթ Թովմասյանը, քաղաքային իշխանության այլ ներկայացուցիչներ:
ԳՈՀԱՐ ԳԱԼՏԱԳԱԶՅԱՆ
ԼՈՒՍԱՆԿԱՐՆԵՐԸ՝ ՀԵՂԻՆԱԿԻ
>>>
|
|