ՈՒԽՏԱԳՆԱՑՈՒԹՅՈՒՆ
ՍՈՒՐԲ ՍԱՐԳՍԻ ՏՈՆԻ ԱՌԻԹՈՎ
ունվարի
27-ին՝ Սուրբ Սարգսի տոնի ուրախ առիթով, մի խումբ հավատացյալներ,
Զարիկ Իգիթյանի եւ Ժաննա Խաչատրյանի նախաձեռնությամբ, ինչպես նաեւ
Շիրակի թեմի Առաջնորդ Տ. Միքայել արքեպս. Աջապահյանի հայրական օրհնությամբ,
մեկնեցին ուխտագնացության Երեւանի 6-րդ մասիվի Ս. Սարգիս, առաջնորդանիստ
Ս. Սարգիս եւ Ս. Գրիգոր Լուսավորիչ Եկեղեցիներ: Սուրբ Սարգիսը մեր
պատմության հոլովույթում ընկալվել է իբրեւ սիրահարների պահապան ու
բարեխոս Սուրբ, սիրո ճանապարհ հարթող, քաջության եւ անձնազոհության
օրինակ, նեղյալների ապավեն ու վշտացյալների մխիթարող:
Սուրբն
իր վաղեմի կերպարով գալիս է՝ կրկին հաստատելու հավատքի համար նահատակության
եւ սրբանալու պայծառ կերպը: Նա հուշում է, որ հավատքի համար չեն
նահատակվում, այլ լույս են դառնում եւ ճառագում դարերով: Նահատակության
լուսե պսակը նա կիսեց իր պատանի որդու՝ Մարտիրոսի եւ տասնչորս զինվորների
հետ: Հայոց աշխարհում նահապետների թափած արյամբ վեր խոյացան քրիստոնեական
հավատքի ընձյուղները, դարձան ծաղկյա խաչքարեր, աղոթաբույր վանքեր
ու սիրո հավատքի տաճարներ:
ՄԱՍԻՎԻ ՍՈՒՐԲ ՍԱՐԳԻՍ ԵԿԵՂԵՑԻ
Ուխտավորները ճանապարհ ընկան վաղ առավոտյան: Տեղ հասնելով՝ Ս. Սարգիս
եկեղեցում ներկա գտնվեցին մատուցվող Սուրբ եւ անմահ Պատարագին: Օրվա
պատարագիչն էր Տ. Կարապետ քհն. Կարապետյանը: Սրբազան արարողակարգի
ընթացքում՝ «Հայր մեր»-ից առաջ, օրվա խորհուրդը մեկնեց պատարագիչ
Տեր Հայրը: Հավարտ Սուրբ Պատարագի ուխտավորներն ստացան Սուրբ Հաղորդություն:
ԵՐԵՎԱՆԻ ՍՈՒՐԲ ՍԱՐԳԻՍ ԵԿԵՂԵՑԻ
Ուխտավորների հաջորդ հանգրվանն առաջնորդանիստ Ս. Սարգիս եկեղեցին
էր: Այստեղ նրանք խոնարհվեցին Սրբի մասունքակիր աջին, որ, Ն.Ս.Օ.Տ.Տ.
Գարեգին Բ Ամենայն Հայոց Հայրապետի արտոնությամբ, բերվել էր Մայր
Աթոռ Սուրբ Էջմիածնից, ինչպես նաեւ Ս. Մաշտոցի անվ. Մատենադարանից
բերված ձեռագիր Ավետարանին, որ 17-րդ դարում (1693 թ.) ընդօրինակվել
է Ավետիս երեցի կողմից՝ նույն եկեղեցում:
Հաջորդ եւ վերջին ուխտատեղին Ս. Գրիգոր Լուսավորիչ եկեղեցին էր:
Այստեղ ուխտավորները վառեցին իրենց հավատքի մոմերը՝ մեկ անգամ եւս
հայցելով Ս. Գրիգոր Լուսավորչի եւ արագահաս Սրբի բարեխոսությունը:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐԸ՝ ՆԵԼԼԻ ՄԻՆԱՍՅԱՆԻ
>>>
|
|