| ՎԵՐԱԴԱՐՁԻ
ՍՊԱՍՈՒՄՈՎ...
ԱՅՑԵԼՈՒԹՅՈՒՆ ՄԻՔԱՅԵԼ ԵՎ ԲԱԳՐԱՏ ՍՐԲԱԶԱՆՆԵՐԻՆ
 րբ
մարդ դառնում է մատնության եւ ուրացության զոհ, նաեւ ապօրինի ազատազրկվում,
ակամայից փակվում է ինքն իր մեջ: Անարդարությունից խոցված ու վիրավոր
հոգին սկսում է փնտրել այն լույսը, որով կարող է բժշկվել: Այստեղ
կարեւոր դեր է խաղում մերձավորների վերաբերմունքը: Փառք Աստծո, որ
դեռ «ապրում» են խիղճն ու մարդկային որակները, եւ որ ամեն այցելություն
ազատազրկման վայր վերակենդանություն ու բժկություն է դառնում անարդարացիորեն
դատապարտվածի համար: Մեծ է Աստված, եւ զորավոր Նրան հուսացողի հոգին:
Թեպետ բանտված, սակայն մենակ չեն Սրբազան Հայրերը, քանզի միշտ ունեն
ցանկալի այցելուներ:
 Այսօր՝
նոյեմբերի 7-ին, ԱԱԾ մեկուսարանում տեսակցեցի Բագրատ եւ Միքայել
Սրբազաններին: Ինչպես արձանագրել եմ բազմիցս, մեր հոգեւոր հայրերն
օժտված են զարմանալի տոկունությամբ, կամքով եւ վճռականությամբ:
Հայ Առաքելական Սուրբ Եկեղեցին, ունենալով այսպիսի նվիրյալ բարձրաստիճան
հոգեւորականներ, չի կարող պարտվել իշխանությունների հրահրած ճակատամարտում:
Այս ծանր օրերին, երբ մեր Ազգային Եկեղեցին ենթարկվում է ասպատակությունների,
այսպիսի մարդիկ խարիսխ ու հենասյուն են՝ մեր արժեհամակարգն ու պետությունը
պահպանելու արդարացի պայքարում:
Սրբազանների կոչը մնում է նույնը. համախմբվել Հայ Առաքելական Սուրբ
Եկեղեցու շուրջ եւ որեւէ պահի չմտածել զիջելու, թուլանալու մասին:
Վհատվելն անկարելի է ինքնության համար տարվող այս պատերազմում:
Թեեւ առողջական բարդ խնդիրներին եւ պահման ոչ բավարար պայմաններին՝
հոգեւոր հայրերը որեւէ պահի չեն տրտնջում: Փոխարենը շարունակում
են իրենց աղոթքներն ուղղել մեր ժողովրդի, պետության անսասանությանը:
Օրվա իշխանություն հանդիսացող խմբակին չի հաջողվել եւ չի հաջողվելու
հալածանքներով, բանտարկություններով ընկճել անսասան ոգու տեր բարձրաստիճան
հոգեւորականներին: Այս ճղճիմ քաղաքականությունը վնասելու է միմիայն
իրենց եւ մոտեցնելու է արդարության հաղթանակի ժամը:
Այսօր Գյումրու Սուրբ Աստվածածին մայր եկեղեցում (Ս. Յոթվերք) տեղի
ունեցավ միասնական աղոթք՝ հաջակցություն Շիրակի թեմի բարեխնամ Առաջնորդ
Գերաշնորհ Տ. Միքայել արքեպս. Աջապահյանի:
ԱԱԾ մեկուսարանում անցկացրած ժամերն անցան րոպեների նման: Մշտապես
հետաքրքիր է լսել հոգեւոր հայրերի ուսանելի խոսքը, պատգամները:
Հավատավոր հայ ժողովուրդն սպասում է Ձեր վերադարձին, սիրելի՛ Սրբազաններ:
«Երանելի է այն մարդը, որն ամբարիշտների խորհրդով չի շարժվում, մեղավորների
ճանապարհին ոտք չի դնում եւ չարագործների հետ համախոհ չի լինում,
այլ հաճույք է ստանում Տիրոջ օրենքներից եւ գիշեր-ցերեկ խորհում
է Նրա պատվիրանների մասին» (Սաղմոս Ա 1-2):
* * *
27.11.2025թ.: Քիչ առաջ ԱԱԾ մեկուսարանում տեսակցեցի Տ. Միքայել
արքեպս. Աջապահյանին եւ Տ. Բագրատ արքեպս. Գալստանյանին:
Սրբազան Հայրերը, ինչպես միշտ, ամուր էին, տոկուն, արդարության հանդեպ
հաղթանակի սպասումով:
Ապշեցնող, գերբնական ուժ ասես լինի նրանց մեջ, որ օգնում է դիմակայել
այս բոլոր փորձությունները: Հավանաբար դա հավատի ուժն է:
Հոգեւոր առաջնորդների բացառիկ օրինակ են անազատության մեջ հայտնված,
բայց իրենց սկզբունքները, հավատը, Եկեղեցին ու Հայրենիքը ԵՐԲԵՔ չդավաճանած
Տ. Միքայել արքեպիսկոպոս Աջապահյանը, Տ. Բագրատ արքեպիսկոպոս Գալստանյանը,
Տ. Մկրտիչ եպիսկոպոս Պռոշյանը: Չմոռանանք նաեւ ապօրինաբար անազատության
մեջ հայտնված Տ. Գարեգին քահանա Արսենյանին:
«Այստեղ, աշխարհում նեղություն պիտի ունենաք, սակայն քաջալերվեցե՛ք,
որովհետեւ ես հաղթեցի աշխարհին» (Հովհ. ԺԶ 33)
Սրբազանների ուղերձը նույնն է. մնալ Հայ Առաքելական Սուրբ Եկեղեցու
կողքին, աջակցել եւ պաշտպանել մեր Սրբություն Սրբոցը:
ԳԱՌՆԻԿ ԴԱՆԻԵԼՅԱՆ
ԱԺ ՊԱՏԳԱՄԱՎՈՐ
* * *
Այս ահավոր ուրացման, դավաճանության, հուդայության ֆոնին ասեմ լուսավոր
հույսի մասին:
Գառնիկ Դանիելյանի հետ այսօր՝ նոյեմբերի 29-ին, մի քանի ժամ Միքայել,
Բագրատ Սրբազանների հետ էի՝ իրենց իսկ խցում: Դժվարությամբ էի գնում,
անհանգիստ էի, ի՞նչ ասեի իրենց հոգեւոր «եղբայրների» ուրացման ֆոնին:
Ասեմ, որ ցավ չունեին, սուտ կլինի: Բայց ականջս ծակեց, նրանց իսկ
բնորոշմամբ, իրենց զգացումը ԱՄՈԹ… տասնամյակներ շարունակ իրենց հետ
ծառայություն մատուցածների, երբեմն դաստիարակածների ու հիմա Հայ
Առաքելական Եկեղեցու դեմ դուրս եկածների վարքի համար:
Բայց սփոփանքը, ավելի ճիշտ՝ գոտեպնդման հիմքը, նրանց ուժն էր, ոգին,
որ մեզ է փոխանցվում:
Բոլշեւիկ չեկիստների ժամանակ էլ եղել են ուրացող, եկեղեցու դեմ դուրս
եկած եպիսկոպոս, վարդապետ, քահանա… նրանց դավաճանության ֆոնին գնդակահարվեցին
սրբազաններ, բազում քահանաներ:
Տասնամյակներ անց ուրացողների անունները հիշում են արհամարհանքով,
իսկ նահատակներին (այսօր՝ բանտերում գտնվողներին) սրբացնելով…
ԳԵՂԱՄ ՄԱՆՈՒԿՅԱՆ
ԱԺ ՊԱՏԳԱՄԱՎՈՐ
>>>
|
|
