Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

ՄԱՅՐ ԱԹՈՌ ՍՈՒՐԲ ԷՋՄԻԱԾՆՈՒՄ ՆՇՎԵՑ ՀԱՅՈՑ
ԱՌԱՋԻՆ ԼՈՒՍԱՎՈՐԻՉՆԵՐԻ ՏՈՆԸ
ԱՍՏՎԱԾԱՄՈՒԽ ՍՈՒՐԲ ԳԵՂԱՐԴԻ ՈՒԽՏԻ ՍՈՒՐԲ ԵՎ ԱՆՄԱՀ ՊԱՏԱՐԱԳ

ոյեմբերի 29-ին Հայաստանյայց Առաքելական Սուրբ Եկեղեցին տոնախմբեց հայոց առաջին լուսավորիչներ Սուրբ Թադեոս եւ Սուրբ Բարդուղիմեոս Առաքյալների տոնը:

Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսի սրբատառ կոնդակով տոնը հռչակվել է Աստվածամուխ Սուրբ Գեղարդի ուխտի օր:

Տոնի առիթով, Ամենայան Հայոց Հայրապետի հանդիսապետությամբ, Միածնաէջ Մայր Տաճարում մատուցվեց Սուրբ եւ անմահ Պատարագ: Օրվա պատարագիչն էր Մայր Աթոռի Գեւորգյան հոգեւոր ճեմարանի ասպիրանտուրայի բաժնի ղեկավար Գերաշնորհ Տ. Դանիել եպս. Ֆընտըգյանը:

Սրբազան արարողությանը ներկա էին Հայ Եկեղեցու թեմակալ Առաջնորդներ, Մայր Աթոռի միաբաններ ու մեծաթիվ ուխտավոր հայորդիներ տարբեր վայրերից, այդ թվում եւ Շիրակի թեմից:

Սուրբ Պատարագի ընթացքում՝ եկեղեցական թափորի առաջնորդությամբ, Գարեգին Երկրորդ Ամենայն Հայոց Կաթողիկոսի ձեռամբ, Մայր Տաճար բերվեց աստվածամուխ Սուրբ Գեղարդը:

Իր քարոզում պատարագիչ Սրբազան Հայրը, անդրադառնալով Հայոց առաջին լուսավորիչների տոնի խորհրդին, ընդգծեց. «Առաքյալները Հայաստան չեկան զորքով, չեկան քաղաքական ծրագրերով, չեկան ազգային փառքի խոստումներով: Նրանք եկան Հիսուս Քրիստոսի եւ Իր թագավորության հույսով ու սիրով: Եվ այդ Ավետարանը ծնեց առաջին քրիստոնյա ազգը: Սա մեր իրական գանձն է, մեր ժառանգությունը, եւ սա է Հայաստանի հոգին»:

Անդրադառնալով մերօրյա մարտահրավերներին՝ Դանիել եպիսկոպոսն ընդգծեց, որ դարերի ընթացքում հայ ժողովուրդը պահել է իր ինքնությունն ու պահպանել Սուրբ Եկեղեցին ոչ թե ուժով, այլ միասնական պայքարով, համատեղ տառապանքով ու հավատքով:

«Մենք պահել ենք միմյանց անապատներից մինչեւ աքսորներ, մինչեւ ցեղասպանություն, մինչեւ լուռ հալածանքներ: Մենք չենք ապրել, որովհետեւ ուժեղ էինք, այլ որովհետեւ մեկ մարմին էինք՝ մեկ Եկեղեցի, մեկ աղոթք, մեկ տեսիլք, մեկ հույս՝ խաչյալ եւ հարություն առած Քրիստոսով:

... Մեր Առաքյալներն այսօր հիշեցնում են, որ երկրի հույսը քաղաքական հաղթանակները չեն, այլ հոգեւոր հարութիւնը եւ սրբությամբ ապրելը»,- ասաց Դանիել եպիսկոպոսը՝ հորդորելով ներկաներին ապաշխարել, քննել իրենց սրտերը, մերժել բաժանման թույնը եւ միմյանց վերաբերվել իբրեւ Հիսուս Քրիստոսի մարմնի անդամներ:

Սուրբ Պատարագի ավարտին Հայոց Հովվապետը, Պահպանիչ աղոթքով եւ հրաշագործ Սուրբ Գեղարդով, օրհնեց ներկա ժողովրդին, ապա հավատացյալներին հնարավորություն ընձեռվեց երկրպագելու եւ համբուրելու համաքրիստոնեական սրբությունը:

Աստվածամուխ Սուրբ Գեղարդը Մայր Տաճարում մնաց մինչեւ Երեկոյան ժամերգության ավարտը:

ՄԱՅՐ ԱԹՈՌ Ս. ԷՋՄԻԱԾԻՆ
ՏԵՂԵԿԱՏՎԱԿԱՆ ՀԱՄԱԿԱՐԳ

>>>