Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

«ՈՐ ՊՍԱԿԴ ԵՔ ԱՄԵՆԱՅՆ ԵԿԵՂԵՑԵԱՑ ՔՐԻՍՏՈՍԻ
ՍՈՒՐԲ ԱՌԱՔԵԱԼՔ»

ոյեմբերի 30-ին Հայաստանյայց Առաքելական Սուրբ Եկեղեցին մեծ շուքով տոնախմբեց հայոց առաջին լուսավորիչներ Ս. Թադեոս եւ Ս. Բարդուղիմեոս Առաքյալների տոնը: Այդ առիթով Ս. Յոթվերք եկեղեցու մի խումբ հավատացյալներ՝ Զարիկ Իգիթյանի նախաձեռնությամբ, ուխտավորաբար այցելեցին Մասիսի Ս. Թադեոս եկեղեցի եւ Մայր Աթոռ Ս. Էջմիածին: Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի սրբատառ կոնդակով տոնը, դեռեւս 2015 թ., հռչակվել է Աստվածամուխ Ս. Գեղարդի ուխտի օր: Այդ օրը, հավատացելոց օրհնության համար, դուրս է բերվում Մայր Աթոռում պահվող համաքրիստոնեական սրբությունը:

Առաքյալները Քրիստոսի սիրո վարդապետության սերմերը ցանեցին դրախտավայր Հայաստանում, քրիստոնեությունը դարձավ «մաշկի գույն», իսկ դարերի բովում հայը միշտ վերահաստատեց Ս. Պողոս Առաքյալի խոսքերը. «Ո՞վ կարող է մեզ բաժանել Քրիստոսի սիրուց՝ նեղությո՞ւնը, թե՞ անձկությունը, թե՞ սուրը» (Հռոմ. Ը 35):

ՄԱՍԻՍԻ Ս. ԹԱԴԵՈՍ ԵԿԵՂԵՑԻ

Բերկրառատ տոնի առիթով Ս. Թադեոս եկեղեցում մատուցվեց Սուրբ Պատարագ: Օրվա պատարագիչն էր Տ. Եզնիկ քհն. Մանդիրյանը: Սրբազան արարողությանը մասնակցում էին Մասյացոտնի թեմի քահանաներ, ինչպես նաեւ ներկա էին տարբեր թեմերից ժամանած ուխտավորներ: Ի դեպ՝ Ս Թադեոս եկեղեցի էր բերվել Տիոջ Խաչափայտի մասունքը՝ ի երկրպագություն ներկաների:

ՄԱՅՐ ԱԹՈՌ Ս. ԷՋՄԻԱԾԻՆ ԵՐԿՐՊԱԳՈՒԹՅՈՒՆ Ս. ԳԵՂԱՐԴԻՆ

Ուխտավորների հաջորդ հանգրվանը Մայր Աթոռն էր: Բարերար Աստված Իր նախախնամությամբ հիմնեց Սուրբ Էջմիածինը՝ հայոց համար բացելով նաեւ դուռը ելքի՝ որպես ազատում ու փրկություն գալիքի չարահատույց ու չարահնար բաժանումների եւ փորձությունների: Աստվածամոխ Ս. Գեղարդը կենաց զեն է, որ առատ օրհնություն եւ բարօրություն է պարգեւում դեպի իրեն եկող անկեղծ, ազնիվ, հավատով, հույսով թեւավորյալ ու սիրով լիացյալ անձանց, բայց միեւնույն ժամանակ բոցեղեն սուր է, որ խորտակում է ամենայն չարը՝ հոգեկան ու մարմնական, երեւելի ու աներեւույթ: Գյումրեցի ուխտավորները երկյուղով համբուրեցին Ս. Գեղարդը՝ խնդրելով բժշկություն, հայոց սահմաններին անսասանություն, սեր, Հայաստանյայց Առաքելական Սուրբ Եկեղեցուն հզորություն, քանզի «Եկեղեցին հայկական հայ հոգիին եւ մարմնոյն զըրահանդերձ է փայլուն, միչ իր խաչերն են դաշոյն եւ զանգակներն են բոմբիւն եւ երգն է միշտ յաղթութիւն» (Վահան Թեքեյան), նաեւ հայրենասեր Սրբազաններին, Սամվել Կարապետյանին ու բոլոր քաղբանտարկյալներին ազատություն:

Վերջին կանգառը Ս. Աստվածածին եկեղեցին էր: Այստեղ նույնպես ուխտավորները միասնական աղոթք առաքեցին առ Աստված եւ վառեցին իրենց հավատքի մոմերը:

ԱԼՎԱՐԴ ԿԱՂԶՎԱՆՑՅԱՆ

>>>